是日大出血=.=

話說日日姐個朋友Mandy有單job搵我做, 但因為其中一個要求係要中午拎D相出去晒, 咁就死啦~ 要咁做, 一定要一部notebook, 用黎揀相(就算唔執相, 都要抄落一個地方去揀~)。最弊既係我無notebook(咁大個仔, 未擁有過一部=.=).......好在, 其實我地搬入大埔既時候都會打算買部notebook俾日日姐用黎睇劇上網, 咁就不如早D買啦。但買乜牌子好呢, 毫無頭緒...之前成日聽日日姐爸爸講, Fujitsu好, 咁就一於唔諗揀呢個牌子, budget就5k-6k。訂好範圍, 早兩日先去瘋澤睇下, 因為貪佢用citibank有10%回贈。見到有部用"i3" CPU, 15.6吋mon, 折實$5998, 唔錯。

好啦, 因為後日就要出job, 今日一定要買到。於是今日中午放工就打算同日日姐出去買。另一方面, Leona之前見到實惠開倉, 同日日姐一齊去, 不過地點.....係西貢, 超遠! 但日日姐想買張床褥俾爸媽, 無計, 遠D都要去。於是今日佢晨咁早就起身, 10:30am約Leona起旺角等一齊入去。點知, 11:30去到......已經無晒貨!!!!!!!! OMG, 入寶山空手回, 個寶山仲要起山卡啦咁遠, 諗起都唔開心, 不過好在, Daisy朋友Stella住起西貢, 於走離開實惠呢個傷心地後就去探Stella, 都叫做入西貢有D野做過。

之後, 我同日日姐出去深水埔meet up。先去黃金睇notebook。頂! 原來瘋澤同百老匯呢D大型連鎖店D notebook超貴的。同一個model, 黃金只係賣$4998!!!!! 仲可以加到8GB ram!!!!! 好在無買到jack。起黃金睇左一轉, 最後都係想買好少少, 於是就將target由 i3 CPU改做 i5 CPU, 價錢都係$5998~ 瘋澤, 你好死吧XD

行行下，忽然間記起上次買燈間舖就起附近！於是上去睇下，入到去，日日姐都話Ｄ燈好平，佢睇中左一盞啡色既倣藤罩吊燈，仲要係大愛o個隻($190 only!)，因為個色水好襯地磚！跟住揀埋房燈同廳既水晶燈($780)本來諗住買嫁啦，但發覺無大埔鎖匙，鄭師傅今日又唔起大埔。。。無辦法，只好下次先買=.=

跟住就係去睇床啦。其實今日黎深水埔主要係買床。因為我地間房窄，只得75吋，現成既油壓床無咁既尺寸，一定要訂造，而之前易僅話佢Ｄ傢私都係起呢度造，於是過黎深水埔睇下。睇左5-6間，款就間間差唔多嫁啦，始終得75吋，床頭只可以做一塊板，都無乜款式可言，所以主力都係睇價錢。幾間裡面，價錢最平既係$2800(14吋高) + $300(加高到16吋)，夾板料。反而易僅介紹o個間仲貴，14吋高已經要$3500，仲要係纖維板=.=，可以不理。睇完晒，心裡有個大概，日日姐話再返去大埔一間傢私舖睇後再決定。

OK! 返去黃金買notebook啦! $5998, hard cash價，連EPS都唔收XD, 今次有勞日日姐俾住先:P。先落$200訂, sales要裝windows, 一個鐘頭後黎拎。於是我地就索性去埋旺角教協買雪櫃。好在有貨，又唔見$2905(好在之前買抽油煙機有$100現金券，所以只係俾$2805)。之後再去星際買eneloop叉電同Lumiquest閃燈色片(出job用)。跟住就返去深水埔，先去螢記買左個山寨ring flash(影花草蟲蟲用), 再返去黃金接我部notebook新玩具，hohoho~

是日行大運大出血報告完畢，多謝收看!!!

10對準新人當中一定有18對係會同屋企人嘈交=.=

話說日日姐琴日同佢媽媽傾緊d結婚野


佢媽媽話: 哎呀, 唔使搞咁多野啦~ 簡單d咪得law

聽落好似為日日姐著想咁

但日日姐回左一句: 其實我已經唔算搞得好複雜, 況且我都係因為你地先搞婚禮, 我想你地開心。

就係呢句"我都係因為你地先搞婚禮", 佢媽媽就發晒火, 覺得日日姐俾說話佢聽, 於是就話: 唔想搞可以唔搞嫁!

咁事實上, 日日姐係唔想搞婚禮的。咁日日姐話: 咁我唔搞得唔得?

佢媽媽竟然答: 點可以唔搞嫁! 就咁俾人地個仔拎走左個女邊得嫁!

哇~~~ 真係啤一聲喎!!!

登登登記 + 做禮服

登登登登~~~ 今日終於做埋最後一樣婚禮必須既樣，就係上網拎婚姻註冊處既籌。

以前聽過好多朋友既經歷，拎呢個籌同打仗差唔多，雖然係網上登記，唔使親身排隊，但因為係先到先得，所以要晨咁早捕起電腦前，仲要話搵好多朋友一齊同時間上網，務求拎到頭幾名既籌。

好在有日日姐幫手，佢起網上搵左好多相關資料，仲俾佢搵到有個叫Roboform既software，可以幫你自動填form，縮短輸入資料時間，咁就可以增加拎到頭籌既機會，YEAH~

我地既註冊日期係9/6/2012, 而最快可以登記呢日既日期就係今日。。。個網每日8:00am先開始運作，我地大約7:30起身準備。因為驚部電腦有咩衣郁，所以之前o個晚係無熄到電腦，驚佢熄左開唔返=.=。而我亦於早兩日之前溫過一次書，試下點用個Roboform同埋點樣登記。好啦，到7:59分，我個心已經跳到怦怦聲，我同日日姐就開始一停reload個網頁。。。一見到入到個網頁之後，心跳加速到十萬倍，感覺就好似以前中學考試，去到得翻一分鐘，但仲有一條問題未答咁樣，不停做做做。。。好！入好晒資料！按繼續！咦！佢話我個HKID已經有人用左！哈哈，因為之前溫習過，知道應該係日日姐已經成功登記左！唔夠5秒之後，日日姐就打電話黎啦～～～YEAH!!! 登記成功！仲要拎到第一個籌！！！日日姐好叻叻！！！

呼，終於任務完成，可以任我地揀想要既時間啦。之前計過，我地其實2:00pm至3:30pm註冊都ok, 如是者，如果拎到1-6號籌都ok既，但而家有頭籌，咁揀時間就更加自由～～～等遲Ｄ計到晒個當日rundown，再決定正式註冊時間。

呀，唔記得講，為左今日既登記任務，我同日日姐都請左半日假。咁請左假就唔好浪費啦，我地10:45am出左去中環，去左間網上都幾出名既「祥興」(中環皇后大道中79號萬興大廈四樓)造我套禮服。呢間野真係好平，$998就可以造到一套禮服(外套+褲)，平過出面買呀真係，而家款式同用料都ok，上網睇過Ｄblog，so far個個都讚，無人彈過。其實本來我地大年初七係上過去一次的，點知一上到去，未開門一特止，門上竟然寫住「大年廿九開市」。哇，真係好生意到唔休做XD。

我地11:00上到去，當時有已經有兩個人度緊身。個師傅叫我地揀下布料先，但見到幾百樣布料，毫無頭緒。。。咁就去睇下衫款先啦。見佢掛左兩款出黎，一款係個領係有個叉位的，另一款係圓領的，我開頭睇落覺得叉領好睇Ｄ，但日日姐話圓領好似young d，於是就著上身試過，哇，圓領o個件大愛啦～著得我好型XD。於是諗都唔使諗，揀呢款啦就！不知不覺間，店裡面多左好多人～～～大約６－７個人度啦，佢地都係黎做西裝的。哇，我同日日姐都偷笑，好在早少少到咋，否則都唔知排到幾時。

好啦，到我度身，個師傅一頭白髮～我估有6-7十歲啦，雖然唔係笑笑口咁同你講野，但亦唔會好似Ｄ恃老賣老既伯伯咁，對你呼呼喝喝，客人有問題佢都會一一作答，感覺都幾好。最後，我地經師傅介紹下，揀左隻黑色料造。兩個星期後叫我打去問做到未～OK!又搞掂一樣!

跟住我地去大快活勿勿食午餐, 12:15 Margaux黎中環交隻介指俾我影相。跟住我同日日姐就分開，佢去返工，我就去北角上一個公司既Seminar。個Seminar上到4:30pm，我就搭叮叮出去接日日姐放工，一齊去銅鑼灣既花園餐廳撐下台腳。食飽飽之後，我地就去宜家行左一陣，睇下新居要買既傢私。基本上宜家我地已經行左9萬幾次，不過次次去都唔悶嫁，因為。。。好多傢私始終仲未諗到買D乜 XDDDDDDDDDD

情人節

今年情人節, 同上年一樣, 都係同Daisy幾位朋友一齊去返同一間酒樓(銅鑼灣信和廣場稻香)打邊邊。因為去其他餐廳食實在太貴啦, 間間都抬高晒價, 而且無得俾你揀, 硬食一款套餐。唔想變做水魚俾人湯, 於是大家, 一共三pair人出黎烚下烚下開心下XD

話說我一放工就趕去搭火車去紅磡轉104巴士, 7點半唔使就去到lu, 一上到酒樓, 見Daisy妹努力咁寫情人節卡, 一見到我, 就"咦~~~~~~~~"一聲很不忿氣地收埋張卡XD 原來佢仲未寫好~ 不過佢都好慘, 原本諗住琴日買既, 但公司竟然突然要OT, 做到成9點, 放工D舖頭都關門lu, 原本諗住今日放工去買, 但間間舖都賣晒! 最後要去到教協, 好彩仲淨返一張! 哈哈!

情人節真係唔講得笑...今晚成間稻香都好靜, 我估得一半客。

食既過程就唔講啦, 都係o個D law, 不過無得食雞子law~ 佢D friend太驚XD, 但就食到我其中一種最愛既鮮草菇, 我食左好多XD







食完, 大家就散, 我同Daisy妹去左Chocolate睇衫, 因為佢識人有半價, 不過就揀唔到=.=。唉, 本來想行多陣街, 不過我又要返屋企執相(M小姐的珠寶相)~ 咁只好早少少走啦~ 臨走前, 我地起地鐵站裡面交換情人節卡。Daisy姐o個張好靚呀, 唔講唔覺係賣淨最後一張既貨品。而佢一打開我張卡時, 大笑左幾十秒XD, 佢好鍾意呢, hahahahaha, 見佢咁開心, 我都好開心!!!

今年情人節雖然係平淡左DD, 但一來為慳錢為結婚(唔去食貴野), 二來為賺錢養Day Day! (早D返屋企執相), 從另一個角度睇, 呢D叫「先苦後甜」^___________________^

買磚記

好啦, 新年前馬鞍山間屋裝修好, 終於到大埔間屋裝修啦。話說新年前幾日鄭師傅已經開始開工, 鑿定野先(其實我覺得佢係想開左個頭, 收左首期錢先:P)。今日就同佢&日日姐出去旺角揀磚啦。我地同師傅約左3:00pm起"和昌"等, 但其實.......我地仲未諗到買乜磚的XD。於是乎我地兩條友早左少少出去旺角再睇下先。因為之前原本係揀好左一隻西班牙布紋磚的, 但實地去過一間砌左呢隻磗既單位睇時, 又發覺唔靚! 只好重新再度過。

好啦, 入左一間舖頭睇, 見到一隻木紋磗幾靚! color tone ok, D紋理又ok! 尺寸都ok! 唔怪得啦, 原來係意大利磗! 實ok啦! XD。不過個價錢又唔算貴喎, 圍起上黎$28一尺, 平常意大利磗至少要$50-$60一尺, 而家$28真係算啦。

之前唔揀木紋磗係因為驚太多掃口, 唔靚仔, 但無計啦~ 其他磗仲核突, 而且睇過阿嵐同易瑾屋企, 佢地都係用木紋磗, 其實都唔錯的~~~ 最後我地終於揀左呢隻木紋磗!!! 仲配埋啡色既掃口粉, 再叫埋鄭師傅舖磗時盡量整細D條掃口, 希望整出黎靚仔D。

價錢...連埋腳線磗...要$10,100! 馬鞍山間屋, 成間既磗夾埋都只係9千幾蚊XDDDDDD 出血就出血啦~~~ 地磗呢家野, 舖左就無得換, 所以我一直話, 只要鍾意, 貴D都無所謂, 反而其他電器呀呢D隨時可以換既就可以買平D~。

好啦, 最難揀既地磗已經揀好~ 其他磗就相對揀得好快。我地去返「和昌」揀埋其他磗：廁所牆身用左一隻西班牙布紋磗，地磗就襯返一隻深色既布紋磗。廚房仲簡單，牆身用白色大陸磗，地面就用左隻由日日姐揀既雲石紋磗。everything done!

最後最後，再同師傅揀埋燈掣。之前睇中既圖形燈掣實在太貴，要百幾蚊一個，而且最大問題係，佢無４個開既掣的，所以最後揀左Clipsal既掣。

yeah, 離裝修完成又邁進左一步，好想快Ｄ睇下裝完間屋會係點XD

搬屋記

馬鞍山呢邊終於起7/1/2012完成裝修, 用左幾日時間執野預備, 我地終於起今日正式搬離大埔, 入住馬鞍山。而大埔呢邊將會起下星期二正式開始裝修。
唔講太多, 影相做紀錄。搬屋前一刻：

12點幾, 搬屋公司既李先生(即係搵返上次搬馬鞍山o個個)一行三個人黎搬屋, 真係快手~ 轉下眼就清走D野:

剩返日日姐屋企既雜物, 等佢地執(日日姐媽媽一早過左黎, 等我地搬走就開始執野):

下面呢個櫃, 想搬埋去馬鞍山, 但因為太大, 師傅要拆散晒先得。之後去到馬鞍山再嵌翻。淨係呢樣工作, $2,000都抵俾啦。

2家姐, 珊珊黎幫手。

OK! 入居搬入~~~ 登登登登~~~ 感覺大左好多XD, 真係開四台麻雀都無問題: 

新屋買燈

話咁快, 馬鞍山o個邊就快裝修完成。上年11月中開波, 估唔到唔夠兩個月就起貨, 不過咁, 我地間屋D房唔使造櫃, 淨係做廚櫃, 而其他野都只係做D基本裝修, 再加上鄭師傅做過幾間呢款屋型既單位, 設計都差唔多, 做慣做熟, 因此更加快。不過又咁, 其實我自己同老媽子都無乜要求, 但求四四正正, 無乜大問題就收貨, 所以唔使師傅翻手做過。

話說早幾日師傅話就快起貨, 催我買埋D燈飾, 佢幫我裝埋。本來諗住放工過去馬鞍山同佢夾, 但後來, 一來想同佢夾完之後立即去買埋燈, 二來過幾日有個攝影比賽deadline, 所以就請左半日假, 順便買完燈之後去影下相。

琴日中午, 放左工後, 就先過去馬鞍山。師傅同我先睇廁所, 差個鏡櫃未裝, 佢話不如買個不鏽鋼鏡櫃, 耐用又易打埋, $500鬆D, ok就幫我買埋, 我一口話ok。跟住就睇埋其他「林嬸」野: 門頂、門背衣架、門zip、牙膏牙刷架、廁紙架、窗簾軌, 夾過大概點整, 師傅一次過幫我買埋裝埋。正, 唔使煩。

但燈一定要自己揀啦。師傅話深水埔有間舖極平, 地點起黃金商場對面(麥當當隔離既福仁商場2樓)。我二話不說就即刻出去買。搭「長命巴士」86C, 剛剛好訓左一覺就到, 快差一點鐘, 成個人醒晒。

去到間舖, 唔算大, around 2-3百尺, 燈都唔算話好多好多, 全部係大路款, 不過就真係極平! 一盞房燈都只係百幾蚊, 有D款既廳燈都只係3-4百蚊! good! 因為之後曾經同日日姐去過深圳睇過D燈, 多數都要2-3百蚊人仔(未計運費喎), 圍起上黎呢度買其實好抵!!! 最後揀左7盞燈(廳2盞, 兩房各一盞, 廁所一盞, 廚房兩盞), 加埋都只係$1,500! 正! 本來諗住買埋廁所盞暖燈, 但佢地無賣, 最後叫左鄭師傅幫我買。

揀好貨, 老闆話要等一個鐘執貨, 同埋同廳燈加電腦掣(控制分三組燈膽開關), 叫我行一陣先。原本諗住乘機周圍影下相, 但竟然落雨!!! 唉, 舉機不能, 作擺。去黃金hea行左一陣, 蕩到5:30pm, 返去, 貨執好, 走人。

日日姐之前俾左個八折的士電話我, call去, 佢話而家得返8折半, 無晒8折嫁啦。ok啦, 照去。深水埔去馬鞍山, 折左後$103。

將D燈拎左上去俾師傅, 同佢講邊盞裝邊度, 聽日搞掂! yeah, 又做完一件事, 鬆晒!~~~

ps, 我通常買野有度好 --- 快! 揀野唔使點諗, 所以D燈揀左20分鐘就揀完。如果換轉係日日姐.....哇哈哈~~~