新屋買燈

話咁快, 馬鞍山o個邊就快裝修完成。上年11月中開波, 估唔到唔夠兩個月就起貨, 不過咁, 我地間屋D房唔使造櫃, 淨係做廚櫃, 而其他野都只係做D基本裝修, 再加上鄭師傅做過幾間呢款屋型既單位, 設計都差唔多, 做慣做熟, 因此更加快。不過又咁, 其實我自己同老媽子都無乜要求, 但求四四正正, 無乜大問題就收貨, 所以唔使師傅翻手做過。

話說早幾日師傅話就快起貨, 催我買埋D燈飾, 佢幫我裝埋。本來諗住放工過去馬鞍山同佢夾, 但後來, 一來想同佢夾完之後立即去買埋燈, 二來過幾日有個攝影比賽deadline, 所以就請左半日假, 順便買完燈之後去影下相。

琴日中午, 放左工後, 就先過去馬鞍山。師傅同我先睇廁所, 差個鏡櫃未裝, 佢話不如買個不鏽鋼鏡櫃, 耐用又易打埋, $500鬆D, ok就幫我買埋, 我一口話ok。跟住就睇埋其他「林嬸」野: 門頂、門背衣架、門zip、牙膏牙刷架、廁紙架、窗簾軌, 夾過大概點整, 師傅一次過幫我買埋裝埋。正, 唔使煩。

但燈一定要自己揀啦。師傅話深水埔有間舖極平, 地點起黃金商場對面(麥當當隔離既福仁商場2樓)。我二話不說就即刻出去買。搭「長命巴士」86C, 剛剛好訓左一覺就到, 快差一點鐘, 成個人醒晒。

去到間舖, 唔算大, around 2-3百尺, 燈都唔算話好多好多, 全部係大路款, 不過就真係極平! 一盞房燈都只係百幾蚊, 有D款既廳燈都只係3-4百蚊! good! 因為之後曾經同日日姐去過深圳睇過D燈, 多數都要2-3百蚊人仔(未計運費喎), 圍起上黎呢度買其實好抵!!! 最後揀左7盞燈(廳2盞, 兩房各一盞, 廁所一盞, 廚房兩盞), 加埋都只係$1,500! 正! 本來諗住買埋廁所盞暖燈, 但佢地無賣, 最後叫左鄭師傅幫我買。

揀好貨, 老闆話要等一個鐘執貨, 同埋同廳燈加電腦掣(控制分三組燈膽開關), 叫我行一陣先。原本諗住乘機周圍影下相, 但竟然落雨!!! 唉, 舉機不能, 作擺。去黃金hea行左一陣, 蕩到5:30pm, 返去, 貨執好, 走人。

日日姐之前俾左個八折的士電話我, call去, 佢話而家得返8折半, 無晒8折嫁啦。ok啦, 照去。深水埔去馬鞍山, 折左後$103。

將D燈拎左上去俾師傅, 同佢講邊盞裝邊度, 聽日搞掂! yeah, 又做完一件事, 鬆晒!~~~

ps, 我通常買野有度好 --- 快! 揀野唔使點諗, 所以D燈揀左20分鐘就揀完。如果換轉係日日姐.....哇哈哈~~~